عهد الوفى باقي على عهـد مبنـاك
اليوم وامس ومابقالي مـن اسنيـن
عهـدٍ صـدوقٍ لا حشـا ماتعـداك
مكتوب باسمـك مايبيلـه براهيـن
تفداك كل الخلـق والـروح تفـداك
راضي بدستورك على الراس والعين
أطلب من المولى يصونك ويرعـاك
قلبي وروحي لك على العهد وافيـن
لا ظرف يبعدني ولا وقت يمحـاك
خذنـي قطـاه ولمّنـي بالجناحيـن
الروح توفيلـك ولايـوم تعصـاك
تمشي على حسب الوفـا والقوانيـن
للبدر نور ونوره الكامـل اعطـاك
والنور قرب النـور للـود نوريـن
القلب يكتب لك غـلا يـوم يقـراك
في صفحة العشاق ما بيـن قوسيـن
كلمة أحبك قاصـره عنـد طريـاك
حبي كبير وكلمـة الحـب حرفيـن
الطيب عاداتك من اولـك لاقصـاك
يامن ملكت القاف جيمه مع السيـن
ينصاك حرفي والمواثيـق تنصـاك
والحب كله لك حـروف ودواويـن
أعطيتك القلب الوفي والغـلا جـاك
كلمه وخذها كاش مـا فيـه بعديـن
